boozih

Noho ireo tsy mahita izay hatokona isan'andro,
Mandry fotsy amin'ny alina, tsy mihinana ny antoandro,
Noho ireo izay tsy mahazo fanafody raha marary,
Ary ireo izay ratsy lamba, rovitra tsizarizary.

Noho ilay reny mai-maso, tsy mahalatsaka tomany,
Manirina ilay menavava vao teraka dia hody tany,
Sy ito ray mangasihasy mitondra tanam-polo mody ;
Noho ilay Rafotsibe boribory toy ny atody.

Noho Ikoto tsy mba afaka nandeha nianatra an-tsekoly
Fa voatery miandry omby, manampy an-drainy izay mpamboly,
Noho Ikala vanton-jaza noterena hanambady
Hanamaivana ny adidin'ny ankohona-mafy ady.

Noho ilay boay kely voatery handao ireo mpiara-monina
Satria alefa hikarama sitrany mba tsy velomina,
Noho Ibozy an-dranomaso tsy mahazo kilalao
Amin'ny andro asaramanitra satria ny ray tsy misy atao.

Noho ilay zaza nogadraina fa nangalatra raha noana,
Noteren'ny tsy fisiana ka nanaonao foana,
Noho ireo tojo ady mafy dia mivarotra ny an-tanana,
Ararotin'ny mpanefo hangoronana fananana.

Noho ireo rehetra ireo sy ny hafa tsy voatonona
No tsy aneken'ny eritreritro hipetrapetraka hionona
Fa tsy maintsy mba miatrika ny anjara fitolomako,
Ho azy rehetra rehetra ireo no ataoko antom-pahavelomako.

Fara Mananjandry
Mayotte - 17 aogositra 2002